KCB mu bikorwa bigamije kongerera urubyiruko ubushobozi mu kwihangira imirimo

May 13, 2019


Mu mateka y’umugabane wacu, abana bashishikarizwaga kwiga bashyizeho umwete kugira ngo bazatsinde ibizamini maze bazabone akazi. Amashuri makuru by’umwihariko impamyabumenyi, yari inzira ifasha umuntu ukiri muto kubona akazi keza, bikamushyira mu mwanya wo gukabya inzozi ze. Jane Mwangi ni Umuyobozi wa KCB Foundation

Ubu byarahindutse. Abantu benshi barimo gukora ibitandukanye n’ibyo bize abandi ugasanga babuze akazi kubera ko nta myanya ikiboneka mu nzego zisanzwe. Kutagira akazi gahoraho cyangwa ubushomeri uyu munsi bimaze kuba nk’ibisanzwe.

Mu Rwanda urubyiruko rwihariye hafi 28.1% by’abaturage bose hamwe barenga miliyoni 12. Ubukungu bw’igihugu bushingiye ku mahirwe ari muri serivisi z’imari, ubuhinzi, ubucuruzi, kwakira abantu, ikoranabuhanga n’itumanaho.

Urubyiruko rw’abasore n’abakobwa rurimo kungukira cyane kuri gahunda zorohereza abashaka gutangira ubucuruzi, kuba u Rwanda ruza mu myanya ya mbere muri Raporo ya Banki y’Isi ku koroshya ubucuruzi, ni ikimenyetso cy’uko rushaka ko kwihangira imirimo bishoboka.

Inzobere mu by’ubukungu zemeza ko ikigero cy’ubushomeri bukabije kiriho ubu gifitanye isano ritaziguye n’imyigishiriza ishishikariza abanyeshuri gushaka akazi aho kubashishikariza kukihangira.

Imyigire ishingiye ku guhanga akazi ituma ibikorwa byinshi bivuka, abanyeshuri bakagira amahirwe ari hejuru yo kubona imirimo. Ingero ni uko ibigo bito n’ibiciriritse bigize 98% y’ibigo byose mu gihugu kandi byihariye 41% by’imirimo itangwa n’abikorera.

Guteza imbere ubumenyi bigira uruhare mu gutanga uburezi bufasha guhanga udushya, guteza imbere ibigo, ubukungu butajegajega, by’umwiharimo mu gutanga akazi gatanga uusaruro. Ibihugu bimwe kuri uyu mugabane byamaze kwimakaza politiki zishingiye ku guteza imbere urubyiruko.

Raporo ya World Economic Forum 2018 yemeje ko kongerera ubumenyi urubyiruko bikwiye kuba ishoramari ry’igihe kirekire ryo guteza imbere ubukungu mu mpinduramatwara ya kane ishingiye ku iterambere ry’urwego rw’inganda.

Kongera ubumenyi bikwiye guhera mu kugabanya icyuho ku isoko ry’umurimo mu nganda no mu zindi nzego zitandukanye zigira uruhare mu iterambere, ku buryo hakeneye amahugurwa ahagije muri izo nzego.

Uyu munsi inzego nk’ubwiza no kwita ku bantu, ubukanishi, imirimo yo mu rugo, ubucuruzi bw’ibikomoka ku buhinzi, ubwubatsi n’ibindi, zidafite abazikoramo bahagije.

Mu 2018, u Rwanda rwongereye imbaraga gahunda yo guteza imbere amasomo y’imyuga n’ubumenyingiro nk’inkingi yo kwihutisha gahunda y’Igihugu y’imyaka irindwi yo kwihutisha Iterambere (2017-2024).

Raporo ya World Economic Forum 2018 yagiriye u Rwanda inama ko kugira ngo rubyaze umusaruro ubwiyongere bw’abaturage rufite, rugomba guha umwanya urubyiruko. Uretse ibyo kandi igihugu cyafunguye amarembo ku bufatanye bwa leta n’abikorera hagamijwe kwimakaza umuco wo gufatanya hagati y’ibigo bya Leta n’iby’abikorera mu kubaka igihugu.

Mu gushyigikira iyi gahunda, KCB Foundation binyuze muri KCB Bank Rwanda, ku bufayanye n’Inama y’igihugu y’urubyiruko, iri kwagura gahunda yayo ‘2jiajiri’ muri iki gihugu, igamije gushyigikira urugendo rw’impinduka mu Rwanda.

Iyo gahunda yiswe KCB Igire yatangijwe umwaka ushize, igamije gushishikariza urubyiruko kureka umuco wo gutegereza gushakisha akazi ahubwo rukiga kwikorera.

Hagaragara icyuho cy’ubumenyi mu rubyiruko, Igire ikaba igamije kubaka urubyiruko rushobora kubona imari shingiro ikenewe ngo rutere intambwe ruve ku rwego rw’abashakisha akazi ruhinduke abagatanga hagamijwe kuzamura ubukungu bw’u Rwanda.

Mu 2018 KCB Foundation yishyuriye amashuri urubyiruko 100 amasomo y’ikoranabuhanga n’itumanaho, guteka, amashanyarazi, mu mashuri makuru y’imyuga n’ubumenyingiro(IPRCs) ya Kigali, Ngoma na Huye.

Ni amahugurwa yaherekejwe no gukurikiranwa no guhuzwa n’abandi bantu, hagamijwe kubategurira kwihangira imirimo. Abarangije bafite imishinga myiza bahawe igishoro ngo batangire ibikorwa byabo. Urundi rubyiruko 200 biteganyijwe ko ruzahabwa gahunda nk’iyo muri uyu mwaka.

Mu myaka itatu gahunda ya 2jiajiri imaze itangijwe ku cyicaro gikuru muri Kenya, yagaragaje impinduka zifatika. Urubyiruko rugera ku 23,000 rwahawe ubumenyi burufasha kwihangira imirimo n’ubumenyi mu bijyanye n’imari.

Uwo musaruro wabonetse ku bufatanye bw’abikorera, guverinoma ya Kenya n’ibigo by’imyuga n’ubumenyingiro bisangiye icyo cyerekezo; intego ikwiye gufatwa n’abandi bagenerwabikorwa bose mu karere.

Hashyizwemo imbaraga nk’izo, birashoboka ko umusaruro w’iyo gahunda wakwira mu karere kose kandi twategura ahazaza heza h’urubyiruko, bikaba ishoramari twizeye ko rizatanga umusaruro kuri buri wese mu gihe kirekire.

Src:Igihe

Kanda hano udukurikire kuri Facebook na Twitter

Give your idea