Imikorere y’ikigega kigamije kuzahura ubukungu bw’u Rwanda bwazahajwe na Coronavirus

June 5, 2020


Banki Nkuru y’u Rwanda, BNR, yashyizeho umurongo n’uburyo ikigega cyo kuzahura ubukungu bw’u Rwanda kizakora. Ni ikigega gifite hafi miliyoni 200 z’amadorali, ni ukuvuga hafi miliyari 186 z’amanyarwanda.

Iki kigega kigamije gutera inkunga ibikorwa by’abikorera byahungabanyijwe n’icyorezo cya Coronavirus.

Minisitiri w’Imari n’Igenamigambi, Dr Uzziel Ndagijimana, aherutse gutangaza ko ari ikigega kizafasha amabanki gutanga inguzanyo iciriritse ibyo byiciro byose kugira ngo bigaruke mu kazi byongere bikore, bibyare umusaruro uzagire ingaruka mu kuzamuka k’ubukungu muri rusange.

Muri iki kigega hashyizwemo ingamba zihariye zifasha amahoteli kuvugurura amasezerano y’inguzanyo afite mu mabanki akaba igihe kirekire n’inyungu zikagabanuka, ndetse ku buryo mu gihe yatangiye gufungura, abona amafaranga aciriritse kugira ngo imirimo yongere ikore.

Imikorere y’iki kigega ireba amabanki 16 y’ubucuruzi n’ibigo by’imari biciriritse. Banki Nkuru y’Igihugu niyo izagicunga, gusa amafaranga ku bakiliya azajya atangwa n’amabanki.

Ku ikubitiro leta yemeye gushyiramo miliyari 100 Frw ariko hagakomeza gushakwa abandi bashyiramo amafaranga kugira ngo cyaguke.

Usibye ku mahoteli, kizafasha mu gutanga igishoro ku bucuruzi bwagizweho ingaruka na Coronavirus kugira ngo bukomeze gukora no kudahagarika abakozi, hari kandi inguzanyo ku bucuruzi buto n’ubuciriritse nabwo bwibasiwe na COVID-19.

Banki Nkuru y’Igihugu izacunga imikorere yacyo, izaguriza amabanki kugira ngo nayo agurize abakiliya bayakeneye. Gusaba inguzanyo bizakorwa binyuze muri banki zibishinzwe, nazo zizajya zikurikirana ikibazo, nyuma zohereza kuri BNR ibyifuzo by’abasabye gufashwa kugira ngo bisuzumwe biganishe no ku cyemezo cya nyuma.

Nyuma yo kwemezwa, amabanki azatanga amafaranga kuri konte y’uwayasabye hanyuma ibyakozwe bigaragarizwe BNR ari nayo izatuma amafaranga agera kuwasabye.

Umuyobozi w’Urugaga rw’Abikorera mu Rwanda, Robert Bapfakurera, aherutse kuvuga ati “nk’ubukerarugendo, amahoteli, byagize ibibazo bikomeye kuko barafunze burundu, nubwo [mu Rwanda] ibibazo [bya coronavirus] byarangira ntabwo ibibazo bizaba byarangiye ahandi hose kuko ubukerarugendo bukorana n’amahanga, bakeneye gufashwa cyane.”

Raporo y’Ishami ry’Ubukerarugendo mu Rugaga rw’Abikorera, PSF, yagaragazaga ko muri Werurwe bwagize igihombo cya miliyari 34.9 Frw, bivuye ku nama zasubitswe n’ibindi bikorwa by’ubukerarugendo byahagaritswe.

Ibi bihombo byaje bisanga urwego rw’ubukerarugendo mu Rwanda rufite inguzanyo za miliyari 87.7 Frw.

Imibare ya Banki y’Isi yo kuwa 9 Mata igaragaza ko ubukungu bwo muri Afurika yo munsi y’Ubutayu bwa Sahara, bwagizweho ingaruka na Coronavirus ndetse ko buzamanuka ku kigero cya -2.1% na -5.1% buvuye kuri 2.4% bwariho mu 2019.

Ikigega Mpuzamahanga cy’Imari ku Isi, IMF, nacyo giherutse gutanga ikigereranyo ko umusaruro mbumbe w’Isi muri uyu mwaka uzamanuka ku mpuzandengo ya -3% naho uw’ubukungu bw’ibihugu byateye imbere kurusha ibindi bumanuke ku kigero cya -6%.

Minisitiri w’Imari n’Igenamigambi, Dr Ndagijimana Uzziel, ati “Ni ibintu bikomeye bidaheruka mu mateka y’Isi. Muri Afurika yo munsi y’Ubutayu bwa Sahara, hateganyijwe ko ubukungu buzamanuka -1.6% […] natwe rero birumvikana ko ubukungu bwacu butazagenda uko busanzwe buteganyijwe.”

Minisitiri Dr Ndagijimana yavuze ko ubu igipimo cy’ubukungu bw’u Rwanda kigaragaza ko butazazamuka ku kigero cya 8% nk’uko byari byitezwe, aho ubu imibare yagiye ivugururwa ikava kuri 5.1%, nyuma biramanuka bigera kuri 3.5% “ubu turi hafi kuri 2% nubwo bitari byarangira neza”.

Src:Igihe

Kanda hano udukurikire kuri Facebook na Twitter

Give your idea