Imvugo niyo ngiro: Masai Ujiri yashimye Perezida Kagame ku iyubakwa rya Kigali Arena

July 29, 2019


Umuyobozi wa Toronto Raptors, Masai Ujiri, yashimye umuhate Perezida Kagame yagaragaje mu kwihutisha imirimo y’iyubakwa rya Kigali Arena, inzu y’imyidagaduro izajya yakira abantu 10 000.

Mu matariki ya 15 Mutarama 2019 nibwo hatangijwe ibikorwa byo kubaka iyi nzu ifite ubushobozi bwo kwakira imikino yose y’intoki, ibitaramo n’inama zikomeye zibera mu Mujyi wa Kigali.

Kuri ubu imirimo yo kubaka Kigali Arena yarasojwe hasigaye umuhango wo kuyitaha ku mugaragaro.

Ni umwe mu mishinga yagutse yubatswe mu gihe gito mu bijyanye n’ibikorwa remezo by’imyidagaduro igihugu gifite.

Masai Ujiri mu butumwa yanditse yifashishije urukuta rwa Instagram rwa Giants of Africa kuri uyu wa 26 Nyakanga 2019, yashimye Perezida Kagame wagaragaje imbaraga mu gushyira mu bikorwa uwo mushinga.

Yagize ati “Imvugo niyo ngiro. Nishimiye cyane Perezida Kagame ku iyubakwa rya Kigali Arena. Mu mwaka ushize yatubwiye ko agiye kubikora. Byarakozwe. Ni urugero rw’intagereranywa rw’aho Afurika ihagaze uyu munsi.’’

Masai ni we Perezida wa Toronto Raptors yo muri Canada iheruka kwandika amateka yo kwegukana igikombe cya mbere cya Shampiyona ya Leta Zunze Ubumwe za Amerika (NBA) nyuma yo gutsinda Golden State Warriors.

Masai w’imyaka 49 uvuka muri Nigeria abinyujije mu mushinga we wa Giants of Africa (GOA) afasha abana bakiri bato bo ku Mugabane wa Afurika gukura bakunda umukino wa Basketball.

Uyu mushinga wa GOA watangiye mu 2003 ukorera muri Nigeria gusa kugera mu 2014 ubwo Masai yafunguraga imipaka atangira kubikora no mu bindi bihugu bitandukanye bya Afurika birimo n’u Rwanda.

Kimwe mu bikorwa byashibutse muri uyu mushinga ni isanwa ry’ikibuga cy’umukino w’intoki wa Basketball cyo kuri Club Rafiki i Nyamirambo. Cyatashywe na Perezida Paul Kagame na Masai Ujiri ku wa 8 Kanama 2017.

Gusana iki kibuga ni isezerano ryatanzwe mu 2015 ubwo abatangije Giants of Africa bazaga mu Rwanda, bakagira umwanya wo kujya guhura n’abana bakinira Basketball kuri Club Rafiki.

U Rwanda kandi ruri mu bihugu birimo Angola, Misiri, Kenya, Maroc, Nigeria, Sénégal, Afurika y’Epfo na Tunisia byatoranyijwe kwitabira ku nshuro ya mbere NBA Africa League.

Ishyirahamwe ry’Umukino wa Basketball muri Amerika ritegura ‘NBA’ ryatangaje ko rigiye gutangiza shampiyona ya ‘NBA’ muri Afurika izitwa ‘NBA Africa League’ izakinirwa mu bihugu bitandatu birimo u Rwanda.

NBA Africa League izatangira mu 2020 izajya yitabirwa n’amakipe 12 avuye mu bihugu bitandatu aho buri gihugu kizajya gitanga amakipe abiri ya mbere muri shampiyona yacyo.

Kigali Arena yashimwe na Masai Ujiri iri mu nyubako zizakira iyo mikino ikomeye. Ni yo inyubako ya mbere nini y’imikino yo mu nzu mu Karere ka Afurika y’Iburasirazuba ndetse iri mu icumi za mbere muri Afurika yose.

Yubatswe mu buryo bumeze kimwe na Dakar Arena iherereye mu Mujyi mushya uri kubakwa muri Sénégal, Diamniadio, nayo yubatswe na Summa, Sosiyete y’Abanya-Turikiya yanakoze imirimo ya nyuma kuri Kigali Convention Centre.

Aho Kigali Arena itandukaniye na Dakar Arena ni uko iyi yo muri Sénégal yakira abantu ibihumbi 15 mu gihe indi yo ari ibihumbi 10 ariko bashobora kurenga bakagera kuri 11 bitewe n’igikorwa yakiriye.

Ifite uburebure bwa metero 18,6 uvuye ku gisenge. Izajya yakira imikino ya Basketball, Volleyball, Tennis na Football ikinirwa mu nzu. Ishobora kwakira ibitaramo, inama mpuzamahanga, ibiterane n’ibindi bikorwa bitandukanye.

Kigali Arena igizwe n’ibice bine (zone), aho buri kimwe gifite abo cyagenewe. Amarembo magari aherereye ahazwi nko mu Migina ku muhanda wa Sport View.

Iyi stade izifashishwa u Rwanda rwakira imikino ya Afrobasket 2021.

Kanda hano udukurikire kuri Facebook na Twitter

Give your idea