Hashyizweho ibipimo fatizo by’ikibanza cy’inyubako, abashoramari bakomeye bahabwa umwihariko

August 1, 2019


Ibipimo fatizo bishya by’ikibanza kigenewe inyubako ni rimwe mu mateka ya Minisitiri ryemerejwe mu nama y’abaminisitiri yabaye ku wa Mbere tariki 29 Nyakanga 2019.

Mu bipimo bishya, ikibanza cyo kubakamo inzu isanzwe yo guturamo cyashyizwe kuri metero kare 300. Ikibanza cyo kubakamo inzu igerekeranye y’amagorofa agera kuri 15 ntikizajya kirenza hegitari imwe.

Mu iteka rishya, ikibanza cyo kubakamo ishuri ry’incuke ntikigomba kurenza metero kare 700, ishuri ribanza rikagira hegitari imwe n’igice, amashuri yisumbuye akagira hegitari ebyiri n’igice, Ikigo cy’amashuri kirimo ay’incuke, abanza n’ayisumbuye ntibirenze hegitari 2.8, ikibanza cy’amashuri y’imyuga n’ubumenyingiro ntikigomba kurenza hegitari eshanu, naho ikibanza cyubakwamo Kaminuza ntikizajya kirenza hegitari esheshatu.

Ku bijyanye n’amavuriro, ivuriro ry’ibanze (Poste de Santé ) rizajya ryubakwa ku buso butarenze metero kare 500, ikigo nderabuzima cyubakwe ku buso butarenze hegitari imwe, ibitaro byigenga n’ibya Leta byo ntibirenge kuri hegitari eshanu.

Insengero ntabwo zigomba kurenza metero kare ibihumbi bitanu, inyubako z’ubucuruzi zo zijyana n’igenamigambi ry’imijyi n’andi mategeko y’uko ubutaka bugenda busaranganywa.

Abashoramari bakomeye bahawe umwihariko

Minisitiri w’Ibikorwa remezo, Claver Gatete yavuze ko bahisemo guha umwihariko abashoramari bakomeye bifuza inyubako mu gihugu ariko bakoze ibikorwa bikomeye bigiteza imbere.

Abo bashoramari hakurikijwe agaciro k’ishoramari ryabo mu gihugu, bazajya bemererwa kubaka ku buso bwisumbuye mu gihe bashatse gutura.

Minisitiri Gatete yagize ati “Dukeneye abantu b’abakire cyane cyane abaza kudufasha. Ufashe nka Howard Buffet wubatse i Nasho kuri hegitari zirenga 1200 […] agashyiraho agace k’ubuhinzi n’ubworozi, akigisha abanyarwanda ku rwego ruhanitse, akubaka imihanda inyuranye, uwo muntu iyo ashatse gutura ha hantu ntabwo ajya muri ya nzu ya metero kare 300, aba ashaka ahantu hanini.”

Mu iteka rishya, mu bice by’icyaro, mu gihe umuntu yazanye mu gihugu ishoramari rifite agaciro kari hagati ya miliyoni 500 Frw kugeza kuri miliyoni 800 Frw , azajya yemererwa kubaka inzu ku buso bungana n’igice cya hegitari.

Uzanye ishoramari riri hagati ya miliyoni 800 Frw kugeza kuri miliyari, azajya yemererwa kubaka inyubako ye ku buso bungana na hegitari, mu gihe uwo ishoramari rye rifite agaciro karenga miliyari, azajya yemererwa kubaka kuri hegitari n’igice.

Mu mijyi, umushoramari uhifuza inyubako afite ishoramari rifite agaciro kari hagati ya miliyari imwe na miliyari 1.2 Frw azajya yemererwa igice cya hegitari. Mu gihe ishoramari rye riri hagati ya miliyari 1.2 kugeza kuri miliyari 1.5 Frw azajya yemererwa kubaka inyubako kuri hegitari mu gihe uzazana ishoramari rirenze miliyari 1.5 Frw azabasha guhabwa ubuso bungana na hegitari imwe n’igice.

Minisitiri Gatete yavuze ko guha umwihariko abashoramari nk’abo ari ugushishikariza benshi kuza guteza imbere igihugu no guha agaciro ishoramari bakoze riteza imbere igihugu.

Yavuze ko ari n’uburyo bwiza bwo kurushaho kunoza imikoreshereze no kububyaza umusaruro.

Gatete yavuze ko gushyiraho ibipimo fatizo by’ikibanza bizanafasha muri gahunda y’imiturire myiza, aho kugira ngo abantu bubake batatanye, bishyire hamwe bubake inzu ziri hamwe zijya hejuru zifite ubushobozi bwo gutuza benshi ku buso buto.

Iri teka rishya rya Minisitiri ryashingiye ku iteka rya Minisitiri rijyanye n’igenimigambi ry’imijyi ryasohotse mu 2016.

Kanda hano udukurikire kuri Facebook na Twitter

Give your idea